கும்பா

 

கும்பா

இரண்டு, மூன்று

தலை முறையின்

நினைவுச் சின்னமாய்

பரணில் படுத்துக் கிடக்கிறது

கும்பாவும்,இணை லோட்டாவும்,

தாத்தாவின் இறப்பிற்குப் பின்

கும்பாவைத் தேடுவாரில்லை வீட்டில்

சில கரப்பான் பூச்சிகளுக்கு

வீடாகவும் ,

சில சிலந்திகளுக்கு

ஓர் சிப்பந்தியாகவும்

தன்னை அடக்கிக் கொண்டு விட்டது கும்பா.

இரு தலைமுறைக்கு முன்

இருந்த தாத்தாவின்

வலிமைக்கு

அது ஓர் உதாரணம் .

கம்மங் கஞ்சியை கரைத்து

கருவாடோடு சாப்பிடுகையில்

தாத்தா கும்பா கும்பாவாய்

சாப்பிடுவாராம் .

தட்டுக்களில்

சாப்பாடு என்றால்

தத்தாவிற்குப் பிடிக்காது .

சாப்பிட்ட மாதிரியே

இல்லையே என்பாராம்.

கும்பாவை புளி கொண்டு

கழுவுவார்கள் போலும் .

இன்றும் கூட

அதன் பளபளப்பு தெரிகிறது .

நவ நாகரிக காலமான இன்று

காலை,இரவு டிபன்

என்றாகிவிட்ட சூழலில்

கும்பாவைத் தேடுவாரில்லை .

ஆனாலும் கூட ,

பரணில் படுத்திருக்கும் கும்பா

தாத்தாவின் நூறுவயது

வாழ்க்கையை அவ்வப்போது

சத்தமில்லாமல் எனக்கு

அடையாளம் காட்டிக் கொண்டிருக்கிறது

தத்தாவைபோல .