நகராட்சியின் சுவர் பேசுகிறது

 

நகராட்சியின் சுவர் பேசுகிறது...{ஒலிபரப்பு -நெல்லை வானொலி} .

@ நான்தான் நகராட்சியின் காவலன்.

மக்களுக்கு அதிக அளவில்

பயன் படுபவன் .

@ என் முதுகில்

''விளம்பரம் செய்யாதீர்கள் ''

என எழுதி என்னை

விளம்பரம் செய்தார்கள் .

@ கொஞ்ச நாட்கள் சென்றன .

புதிதாய் வந்த திரைப் படத்திற்கு ,

'' விளம்பரம் செய்யாதே ''

என எழுதிய இடத்தில்

சுவரொட்டியினை ஒட்டினார்கள் .

@ எனது முதுகின்

ஓரிடம் கைது செய்யப் பட்டிருப்பதை

உணர்ந்தேன் .

@ மறுநாள் ....

என் பக்கம் வந்த மாடு ஓன்று ,

படத்தின் நாயகனையும் ,

நாயகியையும் தன் வயிற்றுக்குள்

எடுத்துக் கொண்டது .

@ என்வண்ணம்

சுவரொட்டியோடு ஒட்டிக்கொள்ள

அவ்விடம் தேமலாய்ப் போனது

என்னுடலில் .

@ நாட்கள் நகர்தலில்

அரசியல் தலைவரின் வருகையால் ,

மீண்டும் வண்ணமாக்கப்பட்டு ,

விளம்பரம் சுமந்து நின்றேன் .

@ இரவு நேரங்களில் ,..

பொது மக்கள்

ஆள் யாரும் பார்க்கவில்லை

என்ற நினைப்பில் சிறுநீரால்

குளிப்பாட்டுகிறார்கள்

பாவம் ..... என்னோடு

அரசியல் தலைவரையும் .

@ சில நாட்கள் என்னை

ஆண்கள் ஆசையாய்ப் பார்ப்பார்கள் .

அப்போதெல்லாம்

ஆபாச சுவரொட்டிகள் என்மேல் .

@ அடிக்கடி என் நிறம் மாறும்

தேர்தல் காலங்களில் ....

கட்சிக் கொடிகளைக்

கவலையோடு சுமந்திருப்பேன்

மக்களைப்போல ...!

# மு.மகேந்திர பாபு. (நன்றி - அ.இ.வானொலி -நெல்லை )