பெண் சிசுவின் கதறல்

 

பெண் சிசுவின் கதறல்

நாஞ்செஞ்ச

பாவந்தான் என்ன ?

நீ

என்னை ஏன் கொன்ன ?

பத்துமாசம்

சுமந்துதானே பெத்த ?

என் கழுத்த நெரிச்சுக்

கொல்லும் போதே

நீயும் செத்த.

முள் மண்டிக் கெடக்குது

ஓன் மனசு.

பிறந்து ரெண்டு நாத்தானே

ஆகுது என் வயசு.

தவறான தொடர்புனாலே

நான் பிறந்தேனோ ?!

பத்துமாசம் இருந்துவிட்டு

படக்குனுதான் இறந்தேனோ ?

தப்பெல்லாம் 

செஞ்சது நீ.

தப்பமுடியாது

உனை வாட்டும்

என் ஞாபகத் தீ.

யாருக்குப் பயந்து

இந்தச் செயல் செஞ்ச ?

பூப்போல மலர்ந்துவந்த

இந்தப் பிஞ்ச?

நாய் கடிச்சு நான்கெடக்கேன்

வேலிப் புதர்ல.

என்ன தாயே !

எனக்கு வந்த கொடும

புரியாத புதிர்ல.

பெண் குழந்ததான்

ஒன்ன வாழவைக்கும்.

மகாராணி போல முதுமையில

மனசால ஆளவைக்கும்.

என்னோட போகட்டும்

இந்த நெல.

வேணாம் செய்தியா 

இன்னொரு பெண்சிசுக் கொல.

இன்றைய ( 14 - 09 - 14 ) நாளிதழ் செய்தி கண்டு மனம் கனத்து எழுதியது )

மு.மகேந்திர பாபு.