டிவி சேனல்

 

நிபந்தனைகளின் பேரிலேயே

உணவு உண்ண அமர்கிறாள் மகள்.

சோட்டா பீம் தவிர

வேறு எந்த சேனலுக்கும்

மாறிவிடக் கூடாதாம் .

மொழிப் பிரச்சனை

அவளுக்கு இல்லை.

தமிழ் , ஆங்கிலம், இந்தி என

அனைத்திலும் பார்க்கிறாள்.

விளம்பர இடைவேளைகளின் போதெல்லாம்

உணவு உண்ண இடைவேளை

விட்டு விடுகிறாள்.

மகளுக்கு நண்பர்களான பீம்

கூட்டாளிகள்

இப்போது பகையாளிகளாக

மாறிவருகிறார்கள் எனக்கு !

மு.மகேந்திர பாபு.

ஆக்ரமிப்பு

சோட்டா பீமும்,நிஞ்சா கட்டோரியும்

மகளின் விருப்பமானதால்

பெருநேரங்களை மகள் ஆக்ரமித்தும் ,

சமையல் நிகழ்ச்சிகளாலும் ,

நெடுந் தொடர்களாலும்

மீதி நேரங்களை

மனைவி ஆக்ரமித்தும் ...

எனக்கும் தொலைக்காட்சிக்குமான

நேரம் ஒதுக்கித் தரப்படுகிறது

மின்வெட்டு நேரத்தில் மட்டும்.