ஆசிரியர் என்பதில் பெருமிதம் கொள்வோம் !
ஆசிரியர் என்பதில் பெருமிதம் கொள்வோம் !
மாணவர் மனதை அன்பினால் வெல்வோம் !
சின்னச் சின்னப் பிள்ளைகளை சீர்திருத்தும் தெய்வம்
ஆசிரியர் ஒருவராலே உலகு தினமும் உய்யும்
வகுப்பறையில் கருத்துக்கள் தேன்மழையாய்ப் பெய்யும்
மாணவரை மகிழ்ச்சியாக மாற்றத்தானே செய்யும். !
அகரம் சொல்லி சிகரம் தொட வைப்பார்
எழுத்தாணியாலே அறிவெனும் ஆடைதனை தைப்பார்
பாட்டும் கதையும் வகுப்பறையை கலகலவென ஆக்கும்
காண்போரின் கண்கள் வகுப்பறையை நோக்கும் !
நாட்டு நடப்பை நாள்தோறும் சொல்வார்
நாயகனாய் மாணவர் மனதை வெல்வார்
குழந்தையோடு குழந்தையாக மாறி விடுவார்
இனிமையான பேச்சினாலே இதயங்களைத் தொடுவார் !
எங்கள் முன்னே விரிந்திருக்கும் உலகம் அவர்
ஆசிரியர் போல் அகிலத்தில் வேறு எவர் ?
கற்றவனாய் பெயர் பெற்றவனாய் மாற்றுவார்
கவலை கொண்ட உள்ளங்களைத் தேற்றுவார்.!
கண்முன்னே நடமாடும் பகுத்தறிவு நூலகம்
காலங்களை வென்று நிற்கும் மானுடம்
எங்கள் ஆசிரியர்க்கு இணை யாருமில்லை
ஆசிரியரை மறந்துவிட்டால் நற் பேறுமில்லை !
மு.மகேந்திர பாபு , ஆசிரியர்.
0 Comments