குழந்தை

 

குழந்தை

@ வண்டிச் சத்தம்

கேட்டவுடன்

ஆவலோடு வந்து

காத்திருக்கிறது

வாசலில் குழந்தை .

@ ''அப்பா என்னையும் நாளைக்கு

டூட்டிக்கு கூட்டிட்டுப் போ ''

செல்லப் பேச்சில்

கைதூக்கி நின்று

தூக்கச் சொல்கிறது .

@ அப்பா குளித்து வந்தவுடன்

தூக்குகிறேன் எனச் சொல்லி ,

பொம்மைகளோடு உறவாட

விட்டுச் செல்கிறேன் .

@ குளித்து வந்த உடன்

குழந்தை வருகையில் ,

தவிர்க்க முடியாத

அலைபேசி அழைப்புகள் .

@ தொடர் பேச்சில்

ஏக்கத்தோடு என்னைப்

பார்த்துக் கொண்டிருக்கிறது குழந்தை .

@ உறவினரின் அழைப்பு .

' 'உடனே வா ''

கடைக்குச் செல்ல வேண்டும் .

தவிர்க்க முடியாமல்

புறப்படும் போது,

என்னையும் கூட்டிட்டுப் போ

கெஞ்சுகிறது .

@ '' இருட்டில் பூச்சி

கண்ணில் பட்டு விடும் ''

அப்பா உடனே வந்திருவேன்

சமாதானம் சொல்லி புறப்பட்டு ,

@ நள்ளிரவில் வீடு வந்து சேர்கையில் ,

பொம்மையைக் கட்டிப் பிடித்துக் கொண்டு ,

பொம்மையோடு

பொம்மையாக குழந்தை .

@ ஆழ்ந்து பெருமூச்சு விடுகையில்

தெறிக்கிறது

குழந்தையின் மீதான

என் ஏக்கப் பெருமூச்சு .