ஓலைக் கொட்டானும்,ஓசோன் ஓட்டையும்

 

ஓலைக் கொட்டானும்,ஓசோன் ஓட்டையும்

ஊருக்கு மாமா

வருகிறார்

என்றாலே மகிழ்ச்சிதான்

காரணம் ,

மாமாவின் இரண்டு கைகளிலும்

ஐந்தடுக்கு டிபன் கேரியரைப்போல்

ஓலை கொட்டானில்

தின்பண்டங்கள் வாங்கி வருவதால் .

கீழ் அடுக்கிலிருந்து

சேவு ,மிச்சர் ,சீவல் ,

கருப்பட்டி மிட்டாய் ,

சீனி மிட்டாய் என

ஒவ்வொரு அடுக்கும் நிறைந்திருக்கும்

மாமாவின் மனசைப்போல் .

பல நாள் கொட்டனுக்குள்

இருந்தாலும்

நமத்துப் போகாமல்

முருமொருப்பாகவே இருக்கும் .

தின்று முடிக்கப்பட்டபின்

கொட்டான்கள்

கடைக்குச் சென்று பொருள் வாங்கவும்

விதைப்பு நேரத்தில்

விதைப் பெட்டியாகவும் ,

வீட்டில் பொருள் போட்டு வைக்கவும்

பல நாட்கள் கழிந்த பின் ,

ஓட்டையாகி விட்டால் ,

அடுப்பெரிக்கவும் ,

என பல அவதாரங்கள் எடுக்கும் .

இன்றெல்லாம் கொட்டங்களை

காண்பதே

அரிதாகி விட்டது .

ஒரு ரூபாய்க்கு

மல்லிதழை வாங்கினாலும் ,

பாலித்தின் கவர் கொடுங்க

எனக் கேட்கும் மனநிலை .

மஞ்சள் பை

தூக்கிச் செல்வது

கௌரவ குறைச்சளாகி விட்டது .

இயற்கையோடு

நம்மையும் தின்று கொண்டிருக்கிறது

பாலித்தின் தாள்கள் .

வாழ்வு தந்தது கொட்டான்,

மனிதன் அதை விட்டான் ,

மாசினால் கெட்டான்,

சாகும் வரை

துன்பப் பட்டான் .