சிட்டுக் குருவி

 

சிட்டுக் குருவி

@ தினம் தினம்

பார்த்து மகிழ்ந்த

சிட்டுக் குருவிகளின்

இனம் எங்கே போனது இன்று ?

@ வீட்டு வாசலில் வந்தமர்ந்தும் ,

ஜன்னலில் வந்து நோட்டமிட்டும் ,

தொழுவத்தில் உள்ள பனை விட்டத்தில்

சோளத் தட்டைகளாலும் ,

சில்லாடைப் பஞ்சாலும் கூடு கட்டி ,

குடும்பத்தோடு வாடகை இன்றி ,

வளமாய் வாழ்ந்ததும் ........

@ விதைப்பு முதல் அறுவடை வரை

காட்டில் காலம் தள்ளி ,

இலந்தைச் செடிகளின் முட்கள் நடுவிலும் ,

கம்மன் தட்டை , சோளத் தட்டையில்

ஒரு பொறியாளனாய்

வரை படமின்றி வீடு கட்டியும் ....

@ கம்மங் கதிரின் உச்சியில்

இலாவகமாய் உட்கார்ந்து ,

ஊஞ்சலாய் ஆடி,

தலை கீழ் அமர்ந்து கதிர் தின்று .....

@ எங்களுக்கும்

சங்கம் இருக்கிறது

என்பதைக் காட்டுவதற்காய் ...

ஆயிர மாயிரம் குருவிகளோடு

படை குருவிகளாய் வந்து ...

கம்மங் காட்டையே காணாமல் போகத்

திட்டமிட்டதோ எனப் பயந்து .....

@ தகர டின்னால் தட்டி ,

ஓ....வென குரல் எழுப்பி ,

ஒருவழியாய் ஓட ..ஓட விரட்டி ....

@ அன்று காட்டை விட்டு விரட்டி .....

பின் ஊரைவிட்டு விரட்டி ...

இன்று உலகை விட்டு விரட்டி .....

நினைத்துப் பார்க்கிறோம்

சிட்டுக் குருவிகளுக்கான

நாள் இன்று என .....!

@ மு.மகேந்திர பாபு .