மகாகவி பாரதியார் நினைவு தினம் - செப்டம்பர் 11 - சிறப்புப் பதிவு / Bharathiyar Ninaivu Thinam - SEP 11 - Greentamil.in

 

   மகாகவி பாரதியார்  நினைவு தினம்

                   11 • 9 • 2022

              " அச்சமில்லை  அச்சமில்லை  அச்சமென்பதில்லையே... என   வீரமுழக்கம்  இட்டவர் , அச்சமின்றி, கலக்கமின்றி, தைரிய  வீரனாக , காலனை  எதிர்  கொண்டு  அமைதிப்  பயணமாக, தன்  இறுதிப்  பயணத்தால்   இந்திய   இதயங்களை   இடியென  தகர்த்த  நாள்   இதுதானோ..!

பாரதி... மகாகவி , தேசியக்கவி,  விடுதலைக் கவி , புதுமைக் கவி,  பாட்டுக் கொரு  புலவன்  , சக்திதாசன்,  ஷெல்லி தாசன் , மீசைக் கவிஞன் , முண்டாசுக் கவிஞன்... ,  கவிஞர் ,  எழுத்தாளர்,  ஆசிரியர் , பத்திரிக்கை  ஆசிரியர்  விடுதலைப் போராட்ட   வீரர் , சமூக  சீர்திருத்த வாதி... என  எத்தனை  எத்தனை  பரிமாணங்கள்  இவர்  கண்டது..!

    சுப்பையா  என்ற   சுப்பிரமணியன்  11 •  12 • 1882 -ஆம்  ஆண்டு  சின்னசாமி  ஐயர் - லக்குமி  அம்மாள்  அவர்களின்  மகனாக , எட்டையபுர  ஏந்தலாக   அவதரித்தார். 

        இளவயதிலேயே  கவிபாடும்   திறன்  பெற்றதால்  தமது  பதினோராம்  வயதில் " பாரதி " எனும்  பட்டத்தை   எட்டையபர  மன்னரால்   பெற்றார். 

     தாய் மொழி தன்னில்  தனிப்பெரும்  பற்றுக் கொண்டு   தமிழின்   உயர்விற்கு  வளஞ்சேர்க்கும்  இலக்கியங்கள்  பல  படைத்தார். இவற்றில்  கண்ணன்  பாட்டு , குயில்  பாட்டு  , பாஞ்சாலி  சபதம்  போன்றவை  சிறப்புப்  பெற்றவை.

மேலும்  ஞானரதம்,  சந்திரிகையின்  கதை ,  தராசு  போன்றவையும்  சிறந்த  பயனுள்ள  படைப்புகள் .

   ஆங்கிலேய  ஆட்சியில்   அடிமைப் பட்டுக் கிடந்த  மக்களை ,  தன்  பாட்டுத் திறந்தால்   கட்டியிழுத்தும்,  தட்டியெழுப்பியும்   விடுதலை  உணர்வை  ஊட்டி, காட்டுத் தீயென   களம்  காணச்  செய்தார்.  தானும்  சுதந்திர  போராட்டத்தில்  கலந்து கொண்டு  சிறை  சென்றார் . மூடப்பழக்க  வழக்கங்களை  ஒழித்து  சாதி  பேதங்களற்ற   சமுதாயம்   காண  விழைந்தார்.  பெண் விடுதலைக்கு  ஊக்கம்  தந்து மேன்மைக்கு  பாடுபட்டார் .

படிப்பும் , பதவியும்

    1898 - ஆம்  ஆண்டிலிருந்து  1902 - வரையிலான காலகட்டத்தில்  காசியில்   அத்தை  வீட்டில்  வசித்து , அங்குள்ள  " காசி  இந்துக்   கல்லூரியில்  மெட்ரிகுலேசன்  தேர்வில்  தேர்ச்சி  பெற்றார். பின்னர்  அலகாபாத்  சர்வகலாசாலையில்  வடமொழி , இந்தியிலும்   தேர்ச்சி   பெற்றார்.

மீண்டும்  எட்டையபுரத்து   மன்னர்   அழைப்பின்   காரணமாக  எட்டையபுரம்  வந்து  அரசவைக்  கவிஞராக  அவையை  அலங்கரித்தார். 

ஆசிரியராக...

     மதுரையில்  1904 - ஆண்டு  சேதுபதி  உயர்நிலைப்  பள்ளியில்  தமிழாசிரியராகப்  பணிபுரிந்தார் . அப்போது  இவருடைய  பாடல்  " விவேகபானு "  இதழில்  வெளியானது.பின்னர்  சுதேசி மித்திரன்  நாளிதழில்   துணையாசிரிராகப் பொறுப்பேற்றார். "இந்தியா "  என்னும்  வாரப்  பத்திரிக்கையில்  1907 - ஆம் ஆண்டு  ஆசிரியராகப்  பொறுப்பேற்றார். இவைமட்டுமின்றி  The   Young  India என்ற  ஆங்கில  இதழையும்  பொறுப்பேற்று   நடத்தினார். மேலும்  1908 - ஆம்  ஆண்டு  தமது முதல்  நுலான" ஸ்வேத  கீதங்கள் " என்ற நூலை  வெளியிட்டார்.

" இந்தியா"  பத்திரிக்கையின்  மூலம்  வீர  உணர்ச்சி மிகுந்த  பாடல்களை  எழுதி  விடுதலைப்  போராட்டத்திற்கு  வித்திட்டார்.  இதன் காரணமாக  ஆங்கிலேய   அரசு    தேடியதன்   விளைவாகப்  புதுச்சேரி  சென்றார்.

தலைவர்கள்  நட்பும் , தொடர்பும் 

       1905 - ஆம்  ஆண்டு  வ.உ.சி. அவர்களின்  நட்பு  கிடைக்கப் பெற்றார்.  பின்பு  கொல்கத்தாவில்   " தாதாபாய்  நெளரோஜி "  தலைமையிலான   காங்கிரஸ்  கூட்டத்தில்  கலந்து  கொண்டார். 

     விவேகானந்தரின்  சீடரான   நிவேதா  என்பவரை  சந்தித்து  அவரையே  தமது  குருவாக  ஏற்றார்.  பாலகங்காதர  திலகர்  அவர்களை  தனது  அரசியல்  குருவாக  ஏற்றார்.

1918 - ஆம்  ஆண்டு  விடுதலைப் போராட்டத் தில்  ஈடுபட்டதால்   கைதுசெய்யப் பட்டு  பின்  விடுதலையடைநதார்.   அதன் பிறகு  யாவரிடத்தும்  உதவி கிடைக்காமல்   வறுமையான  நிலைகண்டு  துன்பம் பல அடைந்தார்.  அதன்  காரணமாக  சுதேசிமித்திரனில்  துணையாசிரியராகப்  பணியாற்றினார். 

1921 - ஆம்  ஆண்டு   திருவல்லிக்கேணி யில்   நோய்வாய்ப் பட்டு  பின்  செப்டம்பர்  11 - 9 - 1921 அன்று   தமது  39 - ஆம் வயதில்  விண்ணுலகப்  பதவியடைந்தார்.  

நினைவாகச்   சில  சின்னங்கள்

1948 - ஆம்  ஆண்டு  எட்டயபுரத்தில்  " மணிமண்டபம் " எழுப்பப்பட்டது.

1960 - ஆம் ஆண்டு  பாரதி யின்  உருவம்  கொண்ட  அஞ்சல்  தலை  இந்திய  அரசால்  வெளியிடப்பட்ட து.

1982 - ஆம்  ஆண்டு  பாரதியாரின்   நூற்றாண்டு  விழா  கொண்டாடப் பட்டது.

சிலை  அமைப்பு

        11 • 9 • 1999  - அன்று  எட்டயபுரத்தில்  மணிமண்டப மும் , பாரதியாரின்   திருவுருவச்  சிலையும்  அமைக்கப்பட்டு  சிறப்பிக்கப்  பட்டது .  அன்றைய  பஞ்சாப்  மாநில  முதல்வரான  " தர்பாரா  சிங் " அவர்களால்  திறந்து வைக்கப்பட்டது.

" பகைவனுக்   கருள்வாய்  -- நன்நெஞ்சே 

   பகைவனுக்   கருள்வாய்  . _____  என  பகைவர்க்கும் 

நன்மையையே     தர விழைந்த   மகாகவி , சுற்றத்தின்  பகையால்  பாதிக்கப்பட்டு,  நோயால்    தாக்கப்பட்டு , மண்ணுலக   வாழ்வு தனை விடுத்து , ஆற்றவொண்ணா  துயரம்  கண்டாலும் , என்றும்  அழியாத  புகழாக  , கவிதையாக  , கதையாக  ,காவியமாக,  சமூக  முன்னேற்றத்திற்கு   உறுதுணையாக   உலக  சுழற்சியுடனே   எக்காலத்துக்கும் நம்முடனே  பயணிக்கிறார்.  

அந்த வீரத்தமிழன்  விரும்பிய  பாதையை  ஏற்றம்பெறச் செய்வது நாம்  அவருக்கு   ஆற்றும்  நன்றிகள்  ஆகும். தாய்  மொழியையும்   , தாய்நாட்டையும்  போற்றியவரை  நினைவுகளால்  என்றும்   வணங்குவோம் !

நினைவுகளுடன் , 

பைந்தமிழ் குழு / Greentamil.in