மிதி வண்டி

மிதி வண்டி 

கெஞ்சிக் கேட்டும் 

கிட்ட வில்லை எனக்கு .

எவ்வளவு நேரம்தான் 

மேல்மூச்சு கீழ்மூச்சு வாங்க 

பின்னாடியே ஓடிவருவது  ?

கூடப் படிக்கும் நண்பன்தான் .

ஆனாலும் இன்றுதான் 

அவனே ஓட்டிப் பழகுகிறான் ?

கிராமங்களில்  நூறு வீடுகளில் 

ஒன்றிரண்டில்தான் 

மிதி வண்டிகள் இருக்கின்றன .

பணக்கார வீட்டுப் பையன்களின் 

தோழமை என்பதே கடினம் .

மிதி வண்டி வாங்கிப் 

பழக முடியுமா என்ன ? 

வீட்டிற்குப் போகையில் தருவானாம் .

ஓட்டிப் பார்த்தே 

பல கிலோமீட்டர் வந்து விட்டோம் .

ஏதேனும் 

ஒரு நடுகல்லில் கால் வைத்து ஏறி 

இறங்குவதற்கு  மணல் தரையோ ,

அல்லது பின் சென்று 

வண்டியை பிடிக்க வேண்டும் .

கிட்டிப் பெடல்தான் 

பெரும்பாலும் .

வண்டி எடுத்து வருகயில்

பல நிபந்தனைகள் .

நீ விழுந்தாலும் 

வண்டி விழக்கூடாது .

உனக்கு அடிபட்டாலும் 

வண்டிக்கு சேதம் கூடாது .

எல்லாவற்றிற்கும் 

சரியென்று சொல்லி .......

இதோ நகர்ந்து கொண்டிருக்கிறது 

கிரீச் கிரீச் ....என்ற சத்தத்தோடு ..

என்னைப் போல 

மிதி வண்டியும் மூச்சு வாங்குகிறதோ ...?

மு.மகேந்திர பாபு.