உண்டியல்.

பெரிதாய் இருக்கிறது

கோவிலில் சாமியை விட

உண்டியல்.

கடவுளை வணங்கச் செல்பவர்கள்

கடவுளாக மாறிவிடுகிறார்கள்

திருவோட்டில் காசிடும்போது !

ஆண்டு முழுவதும் எதிரே இருந்தும்

வாழ்க்கையில் முன்னேறவில்லை யாசகன்

கோபுர தரிசனம் கோடிப்புண்ணியம்.

தொட்டுத் தொட்டு 

சிரித்துச் சிரித்துப் பேசுகிறான்

ஆன்ட்ராய்டு போனில் மனிதன்

உறவுகளிடமிருந்து விலகி !

காட்டாற்று வெள்ளமென

கவலை கொண்டது

புற்றிலிருந்து வெளியே வந்த எறும்பு

முதல் மழைத்துளி பட்டவுடன் !

மு.மகேந்திர பாபு