பால்யகாலமும் , தோசையும.

பால்யகாலமும் , தோசையும

தோசை இன்று தினசரி உணவு.

எனக்கோ அன்று திருவிழா உணவு.

அப்பா மாவாட்ட , 

அம்மா மாவு தள்ளிவிட 

ஊர் நடுவில் இருக்கும் 

பொது ஆட்டுஉரல் ' கடக் முடக் ' என

ஊர்க்கதை கேட்டு ஆட்டும்.

அதிகாலை நாலு மணிக்கெல்லாம்

அடுப்பு மூட்டி விடுவாள் அம்மா.

அடியறுத்த கத்தரிக்காயால் 

எண்ணெய் தடவி , தோசைச் சட்டியில் 

சுரீர் என ஊத்தும்போது முழிப்பு வந்துவிடும்.

சுட்ட தோசையை 

பனை நார்ப்பெட்டியில் அடுக்க

விரைத்துக் கொண்டும் ,

முறைத்துக் கொண்டும் 

வளர்ந்து கொண்டிருக்கும் அனுமார் வால் போல.!

நாள் முழுவதும் தோசைதான் சாப்பாடு.

டவுசர் பைக்குள் மடித்து வைக்கப்படும் தோசை

தோழனுக்கானது.

உங்க வீட்லெ என்ன பலகாரம் திருவிழாவுக்கு ? 

ஹையா ... எங்க வீட்லெ தோசையே ... ! 

என மகிழ்ந்த அந்த பால்யத்தில் 

பலகாரமே தோசைதான்.

தோசை மீதான ஆசை 

குறைந்துகொண்டே வருகிறது

தினசரி உணவாகிப் போனதால் .

பால்ய நினைவுகள் மட்டும் 

நெருக்கமாய் இருக்கிறது தோசையோடு !

மு.மகேந்திர பாபு ,