12 ஆம் வகுப்பு - தமிழ் - புத்தாக்கப் பயிற்சிக் கட்டகம் - 2021 - 2022 , கற்றல் - கற்பித்தல் செயல்பாடுகள் - 1 , பகுபத உறுப்புகள் - வினாக்களும் விடைகளும் / 12th REFRESHER COURSE - 2021 - 2022 - QUESTION & ANSWER

 

                       பொதுத்தமிழ்

                          வகுப்பு - 12 

            புத்தாக்கப் பயிற்சிக் கட்டகம் 

                           2021 - 2022

                  கற்றல் விளைவுகள் , 

      கற்றல் - கற்பித்தல் செயல்பாடுகள் 

      மதிப்பீடு வினாக்களும் , விடைகளும்.

                             தலைப்பு  : 1 

                  அ. பகுபத உறுப்புகள்

     வணக்கம் அன்பு நண்பர்களே ! நம்முடைய பள்ளிக் கல்வித்துறை சார்பில் வந்துள்ள தமிழ்நாடு அரசின் புத்தாக்கப் பயிற்சிக் கட்டகம் 12 ஆம் வகுப்பு பொதுத் தமிழில் மொத்தம் 30 தலைப்புகள் உள்ளன. இதில்  கற்றல் விளைவுகள் , ஆசிரியர் செயல்பாடு , கற்பித்தல் செயல்பாடுகள் , மாணவர் செயல்பாடு மற்றும் மதிப்பீடு என்று மிக அருமையாக வடிவமைக்கப்பட்டுள்ளது.

         செப்டம்பர் 1 ஆம் தேதி முதல் வகுப்புகள் தொடங்க உள்ள நிலையில்  மாணவர்கள் மற்றும் ஆசிரியர்களுக்கு இக்கட்டகம் மிகவும் பயனுள்ளதாக அமையும். கட்டகத்திலுள்ள ஒவ்வொரு தலைப்பையும் , அதிலுள்ள செயல்பாடுகளையும் , மதிப்பீடுகளுக்கான விடைகளையும் காண்போம்.

           1 ) பகுபத உறுப்புகள்

கற்றல் விளைவுகள்

* பதம் பற்றியும் அவற்றின் வகைகளைப் பற்றியும் அறியச் செய்தல்.

* பகுபதத்தின் உறுப்புகள் (6) பற்றி விளக்கமாக அறிந்து கொள்ளுதல்.

* சொற்களைப் பொருள் புரிந்து காலத்திற்கேற்பப் பயன்படுத்தும் திறன் பெறுதல்

ஆசிரியர் செயல்பாடு

ஆர்வமூட்டல்

               மாணவர்களே! நாம் மனித உடல் உறுப்புக்களான கண், காது, மூக்கு, கை, கால் எனப் பகுதி பகுதியாகப் பிரிப்போம். அதே போல் தமிழில் உள்ள சொற்களையும் பொருள் தன்மையிலும் உறுப்புகள் தன்மையிலும் பிரிக்கலாம் என்று கூறி ஆர்வமூட்டல்.

கற்பித்தல் செயல்பாடுகள்

செயல்பாடு : 1

பதம் என்பதன் வரையறை :

         ஓர் எழுத்துத் தனித்தோ (அ) ஒன்றிற்கு மேற்பட்ட எழுத்துகள் தொடர்ந்து வந்தோ பொருளைத் தந்தால் அது பதம் எனப்படும். பதம் - பகுபதம், பகாபதம் என இரண்டு வகைப்படும்.

" எழுத்து தனித்தும் தொடர்ந்தும் பொருள்தரின் பதமாம் 

அது பகாப்பதம், பகுபதம் என இருபாலாகி இயலும் " 

என்ப. (நன்னூல் -128)

பதம் = சொல், கிளவி, மொழி என்பர்.

பகுத்தல் = பங்கிடுதல், கூறிடுதல், பிரித்தல் என பொருள் கூறலாம்.

பதம் (2)

பகுபதம் (பிரிக்க முடியும் சொற்கள் )

(பிரித்தால் பொருள் தரும்)

சான்று : கொள்வார் = கொள் + வ் + ஆர்

பகாப்பதம் (பிரித்தால் பொருள் தராத சொற்கள்)

சான்று : கண், சால, பிற

குறிப்பு :

பெயர்ப்பகுபதச் சொற்களைக் காட்டிலும் வினைப் பகுபதச் சொற்களே வழக்கில் மிகுதி.

செயல்பாடு: 2

பகுபத உறுப்புகள் - ஆறு. அவையாவன பகுதி, விகுதி, இடைநிலை, சாரியை, சந்தி, விகாரம்.

1. பகுதி: (முதனிலை)

 * ஒரு சொல்லின் முதலில் வரும் அடிச்சொல்லே பகுதி ஆகும். இதனை வேர்ச்சொல் என்றும் அழைப்பர்.

* விகுதி பெறாத கட்டளை (அ) ஏவல் வினையே பகுதி.

சான்று:

நடந்தான் = நட

ஓடினான் = ஓடு 

படித்தான் = படி

இதில் நட, ஓடு, படி என்பன பகுதி.

2 பெற்றேன் = பெறு (பெற்று இறந்த காலம் காட்டியது.) + ஏன்

பகுதி ஒற்று இரட்டித்துக் காலம் காட்டும்.

2. விகுதி: (கடைநிலை)

* சொல்லின் இறுதியில் வரும்.

* திணை, பால், எண், இடம் ஆகியவற்றைக் காட்டும்.

சான்று :

படித்தான் = படி +த்+த் + ஆன்

 (ஆன் - உயர்திணை, ஆண்பால், ஒருமை, படர்க்கை ஆகியவற்றைக்

காட்டி நிற்கிறது)

வியங்கோள் வினைமுற்று விகுதி க, இய, இயர் (எழுதுக = எழுது + க)

தொழிற்பெயர் விகுதி  - 

தல் ( செய்தல் = செய் + தல்)

பெயரெச்ச விகுதி

அ, உம் ( உரைத்த = உரை + த் + த் + அ)

வினையெச்ச விகுதி

இ, உ (படித்து = படி + த் + த் + உ )

(இதேபோல் தன்மை, முன்னிலை, படர்க்கை - ஒருமை, பன்மை வினைமுற்று விகுதிகளும் வரும்.

செயல்பாடு : 3

3. இடைநிலை:

*  பகுதிக்கும் விகுதிக்கும் இடையில் வரும்.

* காலத்தைக் காட்டும்.

* வினைச் சொற்களில் பெரும்பாலும் இடைநிலை வரும்.

1. நிகழ்கால இடைநிலை - கிறு, கின்று, ஆநின்று

2. எதிர்கால இடைநிலை - ப், வ்

3. இறந்த கால இடைநிலை - த், ட், ற், இன்

4. எதிர்மறை இடைநிலை - ஆ, அல், இல்

சான்று :

2 நடந்தான் = நட+ த்(ந்)+த்+ஆன்

2 பேசான் = பேசு + (ஆ) +ஆன்

மாணவர் செயல்பாடு

              ஒரு மாணவன் கரும்பலகையில் ஒரு சொல்லை எழுத மற்ற மாணவர்கள் ஒவ்வொருவராக வந்து பிரித்துக்காட்டி உறுப்புகளைக் கூறச் செய்தல்.

மதிப்பீடு

1. பதம் என்பதன் வரையறை யாது?

   ஓர் எழுத்துத் தனித்தோ (அ) ஒன்றிற்கு மேற்பட்ட எழுத்துகள் தொடர்ந்து வந்தோ பொருளைத் தந்தால் அது பதம் எனப்படும்.

சான்று :  மா 

                  மாமழை 

2. விகுதி என்றால் என்ன?

      * சொல்லின் இறுதியில் வரும்.

      *  திணை , பால் , எண் , இடம் ஆகியவற்றைக் காட்டும்.

சான்று : 

படித்தான் - படி + த் + த் + ஆன்

திணை : உயர்திணை

பால்       : ஆண்பால் 

எண்      : ஒருமை 

இடம்     : படர்க்கை

**************     **************   ************

GREEN TAMIL  - You Tube - 6 முதல் 12 ஆம் வகுப்பு வரையிலான தமிழ்ப்பாடங்கள் எளிய , இனிய        காட்சிப்பதிவுடன் பெரும்புலவர் திரு.மு.சன்னாசி ஐயா அவர்களின் விளக்கத்தில் கண்டு மகிழலாம்.

திங்கள் தோறும் பெரிய புராணம் பக்தித் தொடர் .

சனி  தோறும் நாலாயிர திவ்யப் பிரபந்தம்

ஞாயிறு தோறும் தமிழ் இலக்கணம்.

மற்றநாட்களில் தினமும்

 கம்பராமாயணம் உரைத்தொடர்.

சிலப்பதிகாரம் மூன்று காண்டங்களும் வரிக்கு வரி விளக்கத்துடன் காட்சிப்பதிவாகக் காணலாம்

**************     ***************    ************