வசவு

 

வசவு

இன்று

எப்படியேனும்

தன மன பாரத்தை

இறக்கி வைத்து ,

நாக்கப் புடுங்குற மாதிரி

நாலு கேள்வி கேட்க வேண்டும் -

நாராயணசாமியின் நினைப்பு இது .

வருஷம் ஒரு தடவ

கெடா வெட்டுறேன் ,

அப்பப்ப பொங்கல் வைக்கிறேன் ,

முடி காணிக்க கொடுக்கிறேன் ,

தினமும் விளக்கு வைக்கிறேன் .

இப்படி

எத்தனை எத்தனை

உனக்காகச் செஞ்சாலும் ,

என் கஷ்டம் நஷ்டம் தீரலையே !

என் கூப்பாடு

உன் செவியில விழலையா ?

இந்த வருசமும் மழை பெய்யாம

கரிசக்காடு

விரிசல் விழுந்து கிடக்கே !

எப்படி பிள்ளைகளை கரை சேர்ப்பேன் ?

என்று உரக்க கத்தினான் .

எல்லாவற்றையும் கேட்டு

அமைதியாய் இருந்தது

அய்யனார் சாமி

அந்த மழை பெய்யா

வானத்தைப் போல !