கிராமத்துத் திருமணம்.

கிராமத்துத் திருமணம்.

பொண்ணுக்கு என்ன போடுவீக ?

கல்யாணச் சந்தையில

மாப்பிளய எங்க தேடுவீக ?

என்ற வார்த்தைக்கு வேலயில்ல.

வரதட்சணை கேக்க

அவன் கோழயில்ல.

வயலுக்குப் போகும்போது

வரப்பேறி நடக்கும் போது

வழிவிட்டு நின்னவளை

நீங்க போங்கன்னு சொன்னவளை

வாழ்க்கையில

விட்டுட்டுப் போகலாமா ?

வாட்டிய கேப்பக் கருது வாசமென

நீட்டிய கம்மங்கருது சுவையென

மெல்ல மெல்ல மனசுக்குள்ள போறா !

அவ பல்லு என்ன பொன்னி அரிசிச் சோறா ?

வெண்டக்கா விரலால

சேத்து வயல் நடும்போது

வேடிக்கை பாக்கப் போனா

வாயால கொன்ன ஒன்னு வைக்குறா !

குறும்புப் பார்வையால

நெஞ்ச ஏனோ தைக்குறா !

ஆசயா வாங்கி வந்த

ஐச அவ வாங்கல !

அன்னக்கி இராத்திரி

அவ நெனப்புல

கண்ணு ரெண்டும் தூங்கல!

சித்திரத் திருவிழாவுக்கு

ஆசயா வாங்கி வந்த

சேலத் துணி.

சிரிச்சுக்கிட்டே மழுப்பிடுவா

கல்யாணத்துக்கு அப்புறம்னு !

விரல் படா காலத்துல

விலகி விலகி போனவ.

கல்யாணம்னு வரும்போது

கலங்கி நின்னு பாக்குறா !

மாலை பூத்திருக்கு !

மனசு உன்ன பாத்திருக்கு !

மஞ்சத் துண்ட கயிறோட

மணமுடிக்க ரெடிதான் !

மேக்கொண்டு பேச

இதென்ன பட்டணமா ?

நக நட்டுனு பேச

புரோக்கர்க்கு தனிகட்டணமா ?

அவ மஞ்சணத்திப் பூதான் !

மணத்தில

மிஞ்சிடுவா மல்லிப் பூவதான் !

மு.மகேந்திர பாபு .